صيــــــــــاد

صبح الصباح .. فتاح يا عليم

والرزق ع الهادي

آخد فلوكتي الطيبة

والدنيا لسة مضببة

ومعايا مِخلة صغيرة

فيها ميتي وزادي

وكل يوم .. وكأنه أول يوم

أفرح لما اشوف النيل

وآلقاه زي ما هوه جميل

زينا كدة ..

صابر مستكين .. راضي

أرمي شبكتي فوق كتفي

وأرمي نفسي عليه

ويشيلني فوق ضهره بحب

زي جواد هادي

ألمح من بعيد

وأنا سارح فوق صفحته

ناس ع الشط تشرب هوا الصبح

وتبص لميته

وتقول : الله ..

صباح جميل .. بس الراجل فقير

ابتسم في نفسي ، وأنا بأفرد شبكتي
وأقول : نعمة

هوه ده رزقي ، وهي دي بلادي

* * *

ابن النيل