إحنا وهما

واحد صاحبي بعت لي الكاريكاتير التالي (شكرا يا عمدة) ، عجبني لأنه بيرسم بوضوح الخط الفاصل بينا وبين العالم اللي سبقنا خطوات واسعة نحو التقدم والمدنية .. مش عارف للأسف اسم الرسام ، وكنت أحب أذكر اسمه لأنه فنان بجد ، ولا اذا كان الكاريكاتير اتنشر قبل كده والا لأ .. لكن على كل حال أحب أعرف آراءكم .. يا ترى الكلام ده صح وألا فيه مبالغة كاريكاتورية ؟

( اضغط على الصورة علشان تقدر تقرا الكلام )

حتة من بلدي - حتة من كبدي

أول مرة كنت ازور مدينة شرم الشيخ ، وبالتحديد مدينة دهب .. ايه الجمال ده .. بقى فيه في بلادنا الأماكن الحلوة دي ونروح بره .. مفيش مانع نتفسح بره ؛ بس نزور بلدنا الأول .. نتفرج الأول على شرم الشيخ والغردقة ومرسى علم .. نروح الوادي الجديد ونزور الواحات (سيوة والخارجة والداخلة والفرافرة) ونستمتع بالأكل الجميل هناك والجو الرائع النقي ، والناس هناك التي لا تقل نقاوة (أنا لسه ما روحتش الوادي الجديد بس سمعت وقريت عنها كلام جميل قوي) الوادي الجديد تقريبا نص مساحة مصر والخير فيها كتير لكن الناس هناك مش كتير .. مفيش زحمة ولا ضوضاء والغريب ان مفيش جرائم ايضا. معرفش ليه الناس كلها محشورة في القاهرة رغم الزحام والتلوث ؟ حتى فرص العمل دلوقت متاحة خارج القاهرة أكتر. كل ما بشوف مكان جميل في بلدي بأفتكر فؤاد حداد وهو بيقول

الرجل تدب مطـرح ماتحب
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال

بيقولوا على القاهرة مصر (واي واحد مسافر من أي محافظة يقولك نازل مصر) لكن انا رأيي ان القاهرة مش هي مصر .. مصر الحقيقية مش هي القاهرة .. مصر الأصيلة الحزينة الطيبة هناك تلاقيها في الأقصر وأسوان والوادي الجديد .. روحوا شوفوا مصر .. فاتك نص عمرك ياللي ما شفت مصر

جالوا فلاح

جالوا فلاح ، وجلت أيوه آني
لا اسمي توتو ولا سوسو .. أنا اسمي علواني
سنين عمري فوج الوش محفورة
وفي الطين عرضي وعنواني
جيت هنا ومهمتي بالعلم ارجع مجد البلد من تاني
لكن لجيت ان البلد مش بلدي
وان الزمان مبجاش زماني
وأجلهم ايه ؟
* * * *
أجول ايه في البلد للعم والخال
وأبوي اللي باع الجيراطين
وأمي اللي باعت الخلخال
أجلهم ايه لما ابعت المرسال ؟؟
* * * *
أجلهم ان الرجالة هنا مخنفسة ترجص وتتهزج
وان الشباب هنا مفسفس تزجه تجلش متلزج
أجلهم ايه ؟
أجلهم ان البنات تسحب كلاب وتمشي تتمخطر
وان الكلاب والجطط ليها حظ في البندر
اجلهم ايه ؟
اجلهم ان الناس هنا تكسب م الهوا الوفات
وان الهوا بيتعطر لما بيهفهف فوج البنات
أجلهم ايه ؟
أجلهم يا ميتين في الأرض .. م الأرض خدتوا ايه ؟
تعالوا شوفوا الكلمة هنا بتسوا كام جنيه
أجلهم ايه ؟
* * * *
منيش جايل ولا عايد
منيش باعت المرسال
ورايح أجطع هدمتي الجديمة ، وحجابي والموال
دي الدنيا هنا ملونة ، وألوانها براجة
وليه أعيش بعيد وأسيب أحلامي مشتاجة
هوا انكتب عليا أفضل طول العمر علواني
ليه مبجاش زيهم .. ليه مبجاش عمرو أو هاني
صحيح أنا جيت هنا لأجل بالعلم أرجع مجد البلد من تاني
لكن .. لجيت ان البلد مش بلدي ، وان الزمان مبجاش زماني
* * * *